Wednesday, June 24, 2009

My Beowulf, Fitt 11: Here Comes Grendel

Fitt 11 - lines 710 to 790, fol. 146r to 147r - contains some of the more exciting moments in the Beowulf narrative. Grendel arrives for the contest of his life.
Ða com of more under misthleoþum grendel gongan godes yrre bær mynte se manscaða manna cynnes sumne besyrwan in sele þam hean wod under wolcnum to þæs þe he winreced goldsele gumena gearwost wisse – fættum fahne ne wæs þæt forma sið þæt he hroþgares ham gesohte – næfre he on aldordagum ær *ne siþðan heardran hæle healðegnas fand com þa to recede rinc siðian dreamum bedæled duru sona onarn fyrbendum fæst syþðan he hire folmum [gehr]an.

Onbræd þa bealohydig ða [he ge]bolgen wæs recedes muþan raþe æfter þon on fagne flor feond treddode eode yrremod him of eagum stod ligge gelicost leoht unfæger – geseah he in recede rinca manige swefan sibbegedriht samod ætgædere magorinca heap þa his mod ahlog – mynte þæt he gedælde ærþon dæg cwome – atol aglæca anra gehwylces lif wið lice þa him alumpen wæs wistfylle wen ne wæs þæt wyrd þa gen – þæt he ma moste manna cynnes ðicgean ofer þa niht þryðswyð beheold mæg higelaces hu se manscaða under færgripum gefaran wolde – ne þæt se aglæca yldan þohte ac he ge*feng hraðe forman siðe slæpendne rinc slat unwearnum bât banlocan blod edrum dranc synsnædum swealh sona hæfde unlyfigendes eal gefeormod – fet ond folma forð near ætstop nam þa mid handa higeþihtigne rinc on ræste ræhte ongean feond mid folme he onfeng hraþe inwitþancum ond wið earm gesæt sona þæt onfunde fyrena hyrde þæt he ne mette middangeardes eorþan sceata on elran men mundgripe maran he on mode wearð forht on ferhðe no þy ær fram meahte hyge wæs him hinfus wolde on heolster fleon secan deofla gedræg ne wæs his drohtoð þær swylce he on ealderdagum ær gemette – gemunde þa se goda mæg higelaces æfenspræce uplang astôd ond him fæste wiðfeng fingras burston eoten wæs utweard eorl furþur stop mynte se mæra – *hwær he meahte swa – widre gewindan ond on weg þanon fleon on fenhopu wiste his fingra geweald on grames grapum þæt wæs geocor sið þæt se hearmscaþa to heorute ateah – dryhtsele dynede denum eallum wearð ceasterbuendum cenra gehwylcum eorlum ealuscerwen yrre wæron begen – reþe renweardas reced hlynsode þa wæs wundor micel þæt se winsele – wiðhæfde heaþodeorum þæt he on hrusan ne feol fæger foldbold ac he þæs fæste wæs – innan ond utan irenbendum searoþoncum besmiþod þær fram sylle âbeag – medubenc monig mine gefræge golde geregnad þær þa graman wunnon þæs ne wendon ær witan scyldinga þæt hit a mid gemete manna ænig – hetlic ond bânfag tobrecan meahte listum tolucan nymþe liges fæþm swulge on swaþule sweg *up astag – niwe geneahhe norðdenum stod atelic egesa anra gehwylcum þara þe of wealle wop gehyrdon – gryreleoð galan godes ondsacan sigeleasne sang sar wanigean – helle hæfton heold hine fæste se þe manna wæs mægene strengest on þæm dæge þysses lifes.

No comments: