Saturday, June 6, 2009

My Beowulf, Fitt 7: Hrothgar Speaks Again

Here is fitt #7, a short one. We begin on fol. 140r and end on 141r, with asterisks marking the beginning of a new side. The fitt covers lines 456 through 498 (Grein's edition).
Hroðgar maþelode helm scyldinga for gewyrhtum þu wine min beowulf – ond for arstafum usic sohtest gesloh þin fæder fæhðe mæste – wearþ he heaþolafe to handbonan mid wilfingum ða hine wedera cyn for herebrogan habban ne mihte – þanon he gesohte suðdena folc ofer yða gewealc ar*scyldinga ða ic furþum weold folce deniga ond on geogoðe heold ginne rice hordburh hæleþa – ða wæs heregar dead min yldra mæg unlifigende bearn healfdenes se wæs betera ðonne ic siððan þa fæhðe feo þingode – sende ic wylfingum ofer wæteres hrycg ealde madmas he me aþas swor.

Sorh is me to secganne on sefan minum gumena ængum hwæt me grendel hafað – hynðo on heorote mid his heteþancum færniða gefremed is min fletwerod wigheap gewanod hie wyrd forsweop on grendles gryre god eaþe mæg þone dolsceaðan dæda getwæfan.

Ful oft gebeotedon beore druncne ofer ealowæge oretmecgas þæt hie in beorsele bidan woldon grendles guþe mid gryrum ecga – ðonne wæs þeos medoheal on morgentid drihtsele dreorfah þonne dæg lixte – eal *bencþelu blode bestymed heall heorudreore ahte ic holdra þy læs deorre duguðe þe þa deað fornam site nu to symle ond onsæl meoto sigehreð secgum swa þin sefa hwette – þa wæs geatmæcgum geador ætsomne on beorsele benc gerymed þær swiðferhþe sittan eodon þryðum dealle þegn nytte beheold se þe on handa bær hroden ealowæge scencte scir wered scop hwilum sang hador on heorote þær wæs hæleða dream duguð unlytel dena ond wedera.

No comments: